Пыдди пуктана коми республикаын олысьяс, дона войтыр!

Бара на шутьовтіс миян дорті 25-ӧд во. Гашкӧ, унаӧн жӧ казявлінныд. Технологичнӧй олӧмад и кадыд ӧдйӧджык лэбӧ. 
И сідз жӧ тэрыба матыстчӧ, рӧдтӧмӧн, Выль во, вӧвлӧн во! Шыӧдча ставныд дорӧ дырджыка не воштыны Выль волысь русӧ. Кутны, пестыны, шонтыны, видзны сьӧлӧм бердын да сетны позянлун асланым челядьлы эскыны Кӧдзыд пӧльсянь бурторъяс лоӧмӧ.
Сиа ставныдлы, дона войтыр, кыпыда пандавны куим вӧлӧс, тройку лошадей – ДЕКАБРЬ, ЯНВАРЬ да ФЕВРАЛЬ, и накӧд тшӧтш, вылӧ лэптӧм  юрӧн, тӧвзьыны аскиа лунӧ, мытшӧдъяс талялӧмӧн, а кӧнкӧ и чеччыштӧмӧн, гӧнитны кодзувъяслы паныд. 
И кыпыд ловруӧн, югыд шондікӧд тайӧ туй вылас аддзыны  быдӧнлы коланаторъяс, паныдавны бур ёртъясӧс, кыйны унджык шуда здук... Тӧвся кӧдзыд кодь ён дзоньвидзалун ставныдлы, ӧзъяна чужӧмбанъяс, помтӧм радлун да небыд лымчиръяс кок улад! 
Выль Воӧн, донаяс! Выль шудӧн! Выль вермӧмъясӧн!

Ольга Рогожникова быд во "Шуда котырса" ичӧт челядьлы гижӧ кокни кывбуръяс, медым кывсӧ челядь оз чегны. 
Кодлы кажитчис - велӧдӧй. Миян Кӧдзыд пӧль сӧмын коми кывбурысь козин сетӧ.

***

Кӧдзыд Пӧль, Кӧдзыд Пӧль, 
Мед тэ некор он ло гӧль, 
Ваян уна-унатор, 
Чӧскыдтор да мичатор, 
Ваян кӧ мен платтьӧ, 
Шуа тэныд аттьӧ! 
***

Талун миян ыджыд гаж, 
Перьям чача выль да важ, 
Ӧшлам найӧс сьылігмоз, 
Мичмӧдамӧй пашкыр коз. 
 
Йӧктӧ кӧч и йӧктӧ ош, 
Кӧза летйӧ ассьыс тош, 
Гӧгӧр ӧзйӧ югыд би, 
Тадзи выльвоасям ми.

***

Лымйыс еджыд-еджыд, 
Тола ыджыд-ыджыд. 
Пасьтала ме пась, 
Лунтыр шӧйтны дась. 
Кӧдзыдысь ог пов, 
Керкаын ог ов! 

***

Мед кӧ градус кызь, 
Босьта аскӧд лызь, 
Перйывла на дадь, 
Кодӧс вӧчис бать. 
Гортӧ дыр ог пыр, 
Оз на кынмы ныр! 
***
Кӧдзыд пӧльыд сюсь, 
Толаӧ оз усь, 
Локтӧ шлоп да шлоп, 
Вайӧ ыджыд ноп. 
- Миянӧ вай пыр, 
Виччысям нин дыр!

Декабрь 23 лунӧ "Коми войтыр" ӧтмунӧмлӧн Президиум чукӧртліс гӧгрӧс пызан сайын коми том войтырлӧн "МИ" котырӧ пырысьясӧс, Национальнӧй политика министерствоын уджалысьясӧс, ревизионнӧй комиссияӧ пырысьясӧс, Сыктывкарса "Коми войтырын" зільысьясӧс кывкӧртавны 2025 -ӧд вося удж, а сідзжӧ  сёрнитны ️"Видзӧдам аскиалунӧ" тема кузя.

Таво артмис чукӧртлыны гӧгрӧс пызанъяс сайын унасикас войтырӧс - томъясӧс и верстьӧӧс, коми кыв велӧдысьясӧс и кагульничаясӧс, власьтбердсаясӧс, сюсь коми войтырӧс республикалӧн ылі пельӧсъясысь да весиг мукӧд регионъясысь.
Сёрнитанторъясӧн вӧліны:
* "Ёнмӧдам ассьыным ловру",
* "Коми кыв- челядьлы, ыджыд вермӧмъяс-республикалы",
* "Кольччам ас му вылын",
* "Видзӧдам аскиалунӧ".

Быд паныдасьӧм дырйи сёрнитысьяс эз сӧмын юксьыны асланыс майшасьӧмъясӧн да мытшӧдъясӧн, но и пуктісны могъяс, вӧзйисны воськовъяс, нуӧданторъяс. Унатор та пиысь пырас мӧдвося уджалан планӧ, мед пӧртны олӧмӧ кӧсйӧмъяс да нырвизьяс.

Быд гӧгрӧс пызан йылысь ми гижлім нин асланым листбокын пыдісяньджык, фотояс да видео сідзжӧ верманныд корсьны миян группаысь Контактысь.

Кутшӧмӧн лоӧ коми йӧзлӧн, коми кывлӧн да коми культуралӧн аскиалуныс - тайӧ абу сӧмын "Коми войтырӧ" пырӧдчысьяслӧн ныртччӧм, а быд коми мортлӧн мог, быдлунъя  удж, ас гӧгӧр коми русӧ кыпӧдӧм, ас челядьӧс коми кывйӧ велӧдӧм, ас кытшын коми культура да традицияяс видзӧм-паськӧдӧм.

А Ті велӧданныд ассьыныд челядьтӧ, внукъястӧ сёрнитны комиӧн да пыдди пуктыны коми традицияяс?

Арсянь Коми Республикалӧн быд кар-районын мунісны коми йӧзлӧн быдвося конференцияяс.
Декабрьын чукӧртчылӧмъяс вӧліны:
4.12.2025 - Интаын, «Сиктъясын олöм котыртöм» тема кузя,
10.12 - Койгортын, "Сикт: мытшӧдъяс да аскиалун. Сиктса том йӧз",
11.12 - Сосногорскын, "Йӧзкостса проектъяс олӧмӧ пӧртӧм",
13.12 - Воркутаын, "Воркуталӧн сӧвмӧм да экология",
22.12 - Чилимдiнын, "Видз-му овмӧс сӧвмӧдӧм",
23.12 - Изьваын, "Изьваса сикт" тема кузя.

Конференцияяс вылын делегатъяс висьталӧны пыді сикт-грездысь майшасьӧмъяс, мытшӧдъяс, мед нӧшта ӧтчыдысь лэптыны колана юалӧмъяс, гижны чукӧртчылӧмлӧн помшуӧмъясӧ-резолюцияӧ да ӧтув власьтбердса йӧзкӧд корсьны петан туйяс. Кывкӧртӧдъяс подув вылын быд кар-районса "Коми войтыр" ӧтмунӧмлӧн юкӧн лӧсьӧдӧ мӧд во кежлӧ ассьыс план, мед збыльмӧдны олӧмӧ колана туйвизьяс.

Быд во кутicны содны Президиумлöн ветлöдлöмъяс, мед пырöдчыны конференцияяслӧн уджö, висьтасьны Исполкомлöн туйвизь йылысь, содтыны шыöдчöмъяс резолюция пытшкö.
Бöръя Исполком вылын тшӧтш вӧчисны та йылысь кывкöртöдъяс.

Пырӧдчӧй кар-районса "Коми войтырлӧн" юкӧнъясӧ, вӧзйӧй ассьыныд отсӧг коми йӧзлысь кыв, культура, оласног видзӧм-сӧвмӧдӧм-бурмӧдӧм могысь!

Помасис коми семьяяслы "Аддзысьлам" нима проект. Арсянь быд тӧлысь коми котыръяс паныдасьлісны мастер-классъяс вылӧ, вурисны традиционнӧй коми паськӧм челядьлы, ворсісны коми играясысь, вӧчалісны салдатъяслы открыткаяс да гижисны комиӧн письмӧяс, нуӧдісны Герой волы сиӧм "Вына войтыр" онлайн фотовыставка семьяпытшса геройяс йылысь.
Ноябрьын чӧсмӧдлісны ӧта-мӧдсӧ коми сёян-юанӧн да юксисны котырпытшса медрадейтана рецептъясӧн.

Декабрь помын 270 морт - республикалӧн кар-районъясысь- волісны семьяясӧн выльвося гаж вылӧ коми театрӧ. Ӧтув пасйисны "Шуда котырлысь" 10 вося юбилей, сьылісны выль коми сьыланкывъяс,  йӧктісны коз гӧгӧр, рисуйтчисны, вундасисны, вӧчалісны аслыныс значокъяс, ворсьсны пу чачаясӧн, видзӧдісны комиӧн мойд, висьталісны комиӧн кывбуръяс, чӧсмасисны юмовторъясӧн...

Видзам коми кыв да культура медводз асланым семьяясын! И Коми Республика пасьта татшӧм котырыс уна! Эскам, мый кужам на видзны пӧль-пӧчьяслысь традицияяс, ёнмӧдам ассьыным вужъяс, нӧшта на паськӧдам ас гӧгӧр коми ру!

Проектсӧ нуӧдісны "Шуда котыр", "Коми войтыр" ӧтмунӧм, Эжваса коми культура шӧрин Национальнӧй политика министерство отсӧгӧн.