Сизимдас куим во сайын миян пӧль-пӧч, мам-бать, чой-вок вӧтлісны Айму вылысь немеч оккупантӧс, зырисны сійӧс веськыда Берлинӧдз да сэні, сылӧн позйын, пуктісны мир пасьтала пӧрӧс висьӧм моз ыджыдалысь фашизмлы пом — нимӧдісны нёль вося войнаын Ыджыд Вермӧм.

Ыджыд дон лои вештӧма сыысь миян страналы — ӧнӧдз на абу стӧча тӧдса, кымын дас миллион морт сетісны ловсӧ, медым козьнавны синваӧн да вирӧн ойдӧм Рӧдиналы сынӧд моз колана Победа. И лыдаӧн нин колины найӧ, кодъяс вермӧны талун висьтавны Ыджыд тыш йылысь ас синмӧн аддзылӧм збыльсӧ. Воысь-во ылыстчӧ войналӧн йӧлӧга, но Россияса дзик быд семьяын видзӧны курыд кад йылысь куслытӧм паметь.

Муӧдз копыр быдӧнлы, коді передӧвӧй вылын либӧ тылын зільӧмӧн лӧсьӧдіс миянлы югыдлӧз енэжа лада-бур олӧм! Ми нэм помӧдз мӧдам казьтывны тіянлысь подвигтӧ да висьтавны сы йылысь асланым челядьлы, пӧль-пӧчӧн шуысьяслы, правнукъяслы...

Дона землякъяс, республикаын олысьяс, гӧсьтъяс, сьӧлӧмсянь чолӧмалам тіянӧс Май 9 лунӧн! Сиам шуда кузь нэм, крепыд дзоньвидзалун, югыд радлун, и Ен мед видзас ставнымӧс шогӧдана война-тышысь!

Вежавидзӧмӧн,

«Коми войтырӧн» веськӧдлысь

Алексей Габов,

ӧтмунӧмса секретарь

Григорий Хатанзейский.