Регыд КОМИ КЫВ да ГИЖӦД лун!!!

2023 восянь май тӧлысся коймӧд шойччан лунӧ Коми Республикаса Юралысьлӧн индӧд серти шуӧма пасйыны Коми кыв да гижӧд лун. Таво тайӧ луныс лоӧ май 19-ӧд лунӧ.
Корам став кар-районын, быд «Коми войтыр» ӧтмунӧмса представительствоын панны уджтасъяс тайӧ лун кузя.
«Коми войтыр» ӧтмунӧмлӧн Президиум да оргкомитет вӧзйӧ нуӧдны ассьыныд панӧмторъяс, а сiдзжӧ сюся пырӧдчыны татшӧм ӧтувъя уджтасъясӧ:

1. Акция «ГижДвиж»
Май 10 – 19-ӧд лунъясӧ ставлы позьӧ гижны любӧй коми кывъя текст (прозаысь, кывбурысь юкӧн, пословица…) лӧз пастаа ручкаӧн ӧти листбок вылын, листсӧ фотографируйтны, пуктыны фото Контактӧ асланыд листбок вылӧ либӧ «Коми войтыр» группаса стен вылӧ, быть содтыны хештег #ГИЖдвиж. Эн вунӧдӧй пасйыны текстлысь ним да гижысьӧс.
Акция «ГижДвиж» нуӧдӧ Маршак нима библиотека «Коми войтыр» ӧтмунӧмкӧд ӧтув.
Акция йылысь унджык лыддьӧй тась – https://vk.com/wall-20662591_53173

2. Коми СЬЫЛАНКЫВЪЯ видеояс
Май 17-ӧд лунӧдз виччысям кар-районъясысь коми сьыланкывъя видеояс, ӧткымынӧс йозӧдам Контактын «Коми войтыр» группаын май 19-ӧд лунӧ.(* лоӧ кӧ уна видео, найӧс кутам йӧзӧдны мукӧд скодитана лунъясӧ!)
- Виччысям выль нимъяс, выль коми сьыланкывъяс, том тӧдтӧм сьылысьясӧс, челядьлысь петкӧдчӧмъяс…
- Сьылысьяслöн арлыд – öти арöссянь сё арöсöдз…
Мед тiянлысь сьылысь кодзувъястӧ тӧдмаласны Республика пасьта и мукӧд регионъясын!
- Видео снимайтӧй паськыда (горизонтальнӧя!!!)
- Видеояс содталӧй группаса видеокудйӧ - https://vk.com/video/playlist/-160407414_1
- Пасйӧй: сьыланкыв ним, авторъяс, кодi сьылӧ, кутшӧм кар/районысь/сиктысь…

3. Коми кыв лунӧн ЧОЛӦМАЛӦМЪЯС
Май 19-ӧд лунӧ виччысям кар-районъясысь представительствояссянь чолӧмалана видеояс, кодӧс тi верманныд асьныд йозӧдны Контактын «Коми войтыр» группа стенмын.
* Виччысям чолӧмалӧмъяс разнӧй коми диалектъяс вылын!
* Видео снимайтӧй паськыда (горизонтальнӧя!!!) 3 минутӧдз.
* Пасйӧй: кодi чолӧмалӧ, кутшӧм кар/районысь/сиктысь…

4. Коми КЫВБУРЪЯСА видеояс
Май 17-19-ӧд лунъясӧ виччысям кар-районъясысь кывбура видеояс, кодӧс тi верманныд асьныд йозӧдны Контактын «Коми войтыр» группа стенмын.
(а сiдзжӧ СОДТӦД позьӧ кывбура видеояс кольны группаса видеокудйӧ, мед оз вошны - https://vk.com/video/playlist/-160407414_2 )
• Кывбуръяс бӧрйыны асланыд либӧ матысса каррайонса гижысьяслысь Коми му, коми кыв, коми йӧз йылысь…
• Видео снимайтӧй паськыда (горизонтальнӧя!!!) 3 минутӧдз.
• Пасйӧй: кывбур ним, гижысь, кодi висьталӧ, кутшӧм кар/районысь/сиктысь…
• Кывбур висьталысьяслӧн арлыд - öти арöссянь сё арöсöдз…

5. Акция "ТӦДА, КУЖА, СЁРНИТА"
Май 17 - 19-ӧд лунъясӧ вӧзъям котыртны кар-районъясса разнӧй организацияясын (школаясын, культура шӧринъясын, гашкӧ и вузасянiнъясын…), администрациякӧд, культура да велӧдан управлениекӧд ӧтув акция «Тӧда, кужа, сёрнита»:
- чолӧмасьны комиӧн
- разӧдны коми кывъя памяткаяс
- тӧдмасьны комиӧн
- чолӧмавны «Коми кыв да гижӧд лунӧн»
- сетавны юалӧмъяс коми кыв йылысь
- тӧдмавны коми гижысьясӧс медтӧдчана кыввбуръяс серти
- А тi тӧданныд? (висьтавны Коми му йылысь интереснӧй факт)…
- …(мукӧд мероприяттьӧ тайӧ лун кузя)...

• Акция нуӧдӧм йылысь фотояса гижӧд (фоторепортаж) содтӧй Контактын «Коми войтыр» группаса стенмӧ май 17- 21- ӧд лунъясӧ, пасйӧй кутшӧм кар/район/сикт/грездын и мый нуӧдiнныд…

6. Коми йöзкöд сёрни (ИНТЕРВЬЮ)
Тема – Коми кыв видзöм да сӧвмöдöм (Мыйла оз сöвмы чужан кыв? Мый оз тырмы чужан кыв видзӧмын да паськӧдӧмын? Кутшöм петан туйяс аддзанныд?...)
• Сёрнитысьяс – 1-2 морт (позьӧ и унджык) быд кар-районын (коми кыв велöдысьяс кындзи юасьны коми кыв радейтысь, активнöй йöзлысь, кывбур, проза гижысьяслысь да мукöдлаын уджалысьяслысь…)
• Видео снимайтӧй паськыда (горизонтальнӧя!!!) 3 минутӧдз.
• Пасйӧй: сёрнитысьяслысь ним, вич, ов; кутшӧм кар/районысь/сиктысь…
• Видео-интервью содтӧй Контактын «Коми войтыр» группаса стенмӧ май 17 - 21- ӧд лунъясӧ.

****************************************************************************
КЫВКӦРТӦДЪЯС вӧчигӧн нимӧдам:

* Медся водзмӧстчысь представительство, кар/район (кодi ыстас медуна уджтас)
* Медся кажитчӧм видео (кодлӧн видео чукӧртас медуна «сьӧлӧм» /лайк)
* Медся том кывбуралысь/сьылысь (кодлӧн лоӧ пасйӧма арлыдсӧ видео улас!)
* Медся сьылысь кар/район (ыстӧм видеояс пӧвстын)
* Медводдза чолöмалысь
* Медся енбиа чолӧмалӧм (оргкомитетлӧн бӧрйӧм серти)
* Медуна йӧза чолӧмалӧм (групповое поздравление)
* Медводдза кывбуралысь
* Кывбур радейтысь кар/район (кодi ыстас медуна кывбур)
* Коми видеоблогер (кодi гижас медуна интервьюа ролик коми кыв видзӧм йылысь)
* Юӧр разӧдысь (оргкомитет бӧръяс репостъяс кузя)

*** Кывкӧртӧдъяс вӧчам май помӧдз.

Юалӧмъяс позьӧ гижны Контактын https://vk.com/komivoityr - «Коми войтыр» группаса сообщениеясӧ либӧ оргкомитетӧ пырысьяслы - Ольга Владимировна Рогожниковалы да Инесса Николаевна Орёллы.

Коми кыв да гижӧд лун – тайӧ коми йӧзлӧн позянлун петкӧдлыны мичсӧ, небыдлунсӧ, озырлунсӧ, коланлунсӧ миян чужан кывлысь. Пырӧдчӧй акцияясӧ паськыдджыка!
Мед быдлаын юргас коми кыв!