ПЕЧОРАЫН КОМИ ВОЙТЫРЛӦН XXXIII РАЙОННӦЙ КОНФЕРЕНЦИЯ ЙЫЛЫСЬ

Йирым тӧлысь 04-ӧд лунӧ Печораын муніс коми войтырлӧн XXXIII-ӧд конференция. Таво сійӧс вӧлі сиӧма сикт-грездъясын мытшӧдъяслы, кодъяс костын эм и уна вояс кыссьысьяс.
Воӧм делегатъяс сёрнитісны ас чужанінын пес да делӧвӧй вӧр заптӧм йылысь, скважинаяс йылысь, прӧст кад коллялан керкаяс йылысь, ФАП-яс йылысь, туйяс йылысь.
Медводз конференция вылӧ чукӧртчысьясӧс чолӧмаліс 36-ӧд №-а садйысь «Пышкай» нима ансамбль. Россияса да республикаса кып бӧрти ставӧн сувтісны да казьтыштісны шы ни тӧв минутӧн СВО вылын усьӧм салдатъясӧс.
Роман Носков, Коми Республикаса национальнӧй политика министр, пӧся чолӧмаліс Печораса коми войтырӧс коми кыв да культура видзӧмын да сӧвмӧдӧмын. Олег Лажаневсянь , «Коми войтыр» ӧтмунӧмлӧн Исполкомӧн веськӧдлысь нимсянь, вӧлі лыддьӧма Чолӧмалана гижӧд да сетӧма Аттьӧалана гижӧдъяс школаясӧн, садъясӧн, культура учрежденньӧӧн да сьылан котырӧн сизим веськӧдлысьлы коми кыв, культура видзӧмӧ да паськӧдӧмӧ ыджыд пай пуктӧмысь.
Ольга Хасанова, «Коми войтыр» ӧтмунӧмлӧн Печораса юкӧнӧн веськӧдлысь, висьталіс ас юӧрын, мый колӧ водзӧ сӧвмӧдны да быд ног кыпыдджыка отсавны сиктъяслы да грездъяслы , ёнджыкасӧ ӧд сэні олысь йӧзыс видзӧны сӧстӧм коми кыв да важдырся оласног.
Галина Яковина, «Печора» муниципальнӧй районӧн веськӧдлысьлысь могъяс недыр кадколастӧ збыльмӧдысь, чолӧмаліс Аттьӧалана гижӧдъясӧн водзмӧстчысь сиктса йӧзӧс да висьталіс «Печораса коми войтырлӧн XXXII-ӧд чукӧрчӧмлысь шуӧм, кодӧс вӧзйӧма Печораса администрация да МР-лӧн Сӧветлы, олӧмӧ пӧртӧм йылысь» юӧр.
Приуральскса делегатъяс, Ретунская Елена да Бажуков Василий, висьталісны ас сиктса мытшӧдъяс да радлунъяс йылысь: Даниловка да Приуральскын уджалӧны кык фельдшер, налы вевт улын сулалӧ керка, Даниловкаын пӧшти нин помалісны дзоньтавны прӧст кад коллялан керка. А мытшӧдъяс пиын- кык сикт костын туй, коді тулысын да арын лолӧ ӧти ыджыд ва гӧпӧн, а сы кузя челядьӧс новлӧдлӧны школаӧдз. Аранечысь Шахтарова Галина юӧртіс, мый годйӧм скважинаӧн оз вермыны вӧдитчыны, с.в., мый колӧ на бурмӧдны гӧгӧрсӧ. Трубицын Александр аттьӧаліс администрацияӧс да республикаса власьтъяс Конецборын выль ФАП пуктӧмысь. Сметанина Галина рад, мый Каджеромын регыд лоас кык судтаа поликлиника, воссис нин биысь видзан выль депо.Попова Зоя ёна кӧсйӧ, мед Медвежкаын лоас кӧть ичӧтик, но шоныд прӧст кад коллялан керка, ӧд сэні олысьяс тшӧкыда аддзысьлӧны гажъяс вылын да репетицияяс вылын. Попова Антонида висьталіс чукӧртчысьяслы, кыдзи эзысь волонтёръяскӧд отсалӧны СВО-лы. А Леонтьева Альбина гожӧмын сӧстӧммӧдӧма уна вося лӧп-ёгысь Урал –из дор да бара на кӧсйӧ ветлыны любуйтчыны нэмӧвӧйся Мусюр-излӧн мичлунӧн.
Сэсся Куренчук Сергей, Конецборса лесничествоысь специалист, гӧгӧрвоӧдіс сиктсаясӧс, мый грездъяс дорса матыс вӧрын абтутӧм вӧсна оз вермыны сетны делянкаяс кок йылын косьмӧм вӧрӧн.
А Чупрова Наталья, «Печорская ЦРБ» йӧзлысь дзоньвидзалун видзан канму сьӧмкуд учреждениеса веськӧдлысьлысь могъяс недыр кадколастӧ збыльмӧдысь, бур нога чуймис, мый йӧзыс ӧні оз нин сэтшӧма элясьны ФАП-яс да врачьяс тымытӧм вӧсна.
Содтӧд вӧзйӧмъяскӧд вӧлі вынсьӧдӧма Постановленньӧ бала. Представительсто нимсянь ӧтмунӧмын водзмӧстчысьяслы сетісны Почёт грамотаяс. Кыпъяс бӧрти Ольга Хасанова чолӧмаліс кагульничаясӧс да велӧдысьясӧс профессия праздникӧн да корис «Пелысь» коми сьыланкыв сылан йӧзкостса ансамбль сцена вылӧ, мед сины ставлы кыпыд лов да шуд.
Выль могъяс сувтӧдӧма. Сӧвмӧ сикт - олӧ войтыр, юргӧ чужан кыв. Мунам водзӧ!