Кулӧмдінса конференция

Помасьöны районъясын быд вося коми конференцияяс. Исполком чукöртö став вöзйöмъяссö, донъялö быд конференциялысь артмöмсö. Миянлы кык пöв нимкодь, кор гижöны сьöлöм кылана кывъяс конференцияса делегатъяс. Гежöда татшöмыс волö. Кулöмдiнын конференция мунiс зэв-зэв тöлка-бура, со и делегат Кузнецова сiдз жö донъялö:

«Бара на усис шуд лоны делегатӧн Коми войтырлöн конференция вылын, кодi мунiс таво Керчомъя сиктын. Мыйла колö тайö аддзысьлöмъясыс?
1. Быд сиктса олöмын эм мытшöдъяс, мый йылысь колö висьтавны, мед чина йоз кыласны да мыйкö вежсяс бурланьö.
2. Кулöмдiнса делегатъяс оз корны-требуйтны, мед власьт вочас на ног, а вöзйöны, кыдзи позьö петны найöс майшöдланторйысь. Ме серти, тайö зэв бур. Öд быдöн вермам корны, а мый ме ачым верма вочны? Тайö юалöмыс тшöкыда кольö риторическöйöн.
3. Быд Куломдiнса сиктысь делегат "висьö" аслас ичöт Рöдина вöсна. Ме серти, тайö медся колана туйыс быдöнлöн, кодi лыддьö асьсö патриотöн и ,окота эскыны, быд сиктса юралысьлöн.
4. Менам чайтöм серти, эз öд весьшöрö локны буретш Керчомъя сиктö "Коми войтырлöн" конференция выло. Республика тшупöдын 2024 воын вöлi вылö донъялöма тайö сиктысьлысь аслыспöлöслунсö. Öти-кö, Керчомъяын портöма олöмö медся бур муниципальнöй практика коми культура видзöм да сöвмöдöмын öтувъя уджтасъяс пыр. Мöд-кö, Керчомъяса шöр школа медся бура дöзьöритö-лелькуйтö коми кыв. Таын ыджыд пай школаса веськöдлысьлöн да велöдысьяслöн, торйöн нин Тарабукина Н. С., Тарабукина А. А., Тарабукина В. В., Булышева Л. Ф. Липина В. С., Кузнецова И. А.-лöн да челядь бать-мамлöн.
Ме ог нин öтчыдысь ло "Коми войтырса" делегатöн. И пыр "вися" аслам дона да муса сикт вöсна. Бара на лои висьталöма миян сиктлы выль школа-сад стрöитöм йылысь да Керчомъя - Воч чорыд веркöса (асфальта) туй вöчöм йылысь. Та вылö вочакыв туй кузя сетiс Колегов А.В., Минстройысь чина морт, мый кутасны бурджыка дöзьöритны тайö туйсö, пока оз ло выльöс вольсалöма, а школа-сад кузя заводитны вöчны проектно-сметнöй документация кöсйысис районса юралысь Рубан С. В. Ме налы эска.
Коми войтырлöн конферция вылын аддзысим «Коми войтыр» исполкомö пырысь бур уджъертъяскöд, тайö Лажанев О. А., Кузьбожева М.В. Терентьев О.М.. Юркарсянь волiсны национальнöй политика министр Носков Р.В., видз-му овмöс министр Елдин С.В., йöзöс велöдан министрöс вежысь Ибрагимов Р.Н., минстройысь Колегов А.В., Каналан Сöветса депутатъяс Косов В.А. да Саладина Т.А. Кулöмдiн районса администрация уджалiс конференция вылын пöшти ставнас, Рубан С.В. веськöдлöм улын, да , дерт, сиктса администрацияясöн веськöдлысьяс тшöтш. Косъя шуны, мый талунъя конференция - сiйö колана, бур аддзысьлöм тэнö гöгöрвоысь войтыркöд. Весиг карса министръяс да найöс вежысьяс лоины ас войтырöн.
И торъя кекöначöмъяс школаса пусьысьяс Есева А. И. Напалкова Н. С.,
Жикина В. И., Лютоева Е. С.-лы. Ок и чöскыда вердöмаöсь гöсьтъястö!.
Торъя шуд усис налы, кодъяс ветлiсны Керчомъя кузя экскурсия вылö. Сиктлысь историяöн да сöвмöм-паськалöмнас юксисны сиктса краеведъяс Самарина Н. А., Ваддоров Д. И. А мед экскурсия волi комфортнöй, старайтчис школаса автобуслöн шофер Белов А. В.
Сöмын коли шуны аттьöалана кывъяс налы, кодъяс зiльöны ас чужан сикт сöвмöм вöсна, да чина войтырлы, кодъяс кылöны куломдiнсаяслысь тöдж-могъяссö».

Ирина Андреевна Кузнецова, Керчомъя сикт