Очередная встреча Исполкома была посвящена сельскому хозяйству в регионе. 18.03.2025
Члены Исполкома МОД "Коми войтыр" провели выездное заседание в КРАПТе (агропромышленном техникуме) в с.Выльгорт Сыктывдинского района. После небольшой экскурсии по техникуму, гаражам, возложению цветов на Аллею героев Коми участники собрались для обсуждения острых вопросов сельскохозяйственной отрасли РК.
С докладами выступили и.о.министра сельского хозяйства и потребительского рынка Сергей Елдин, Главы некоторых районов РК, руководители крупных агрохолдингов и малых сельхозкооперативов, частные предприниматели из Ухты, Корткероса, Сысольского района, Сыктывкара, депутаты Госсовета РК... На заседании присутствовали представители нескольких министерств и ведомств РК.
При подготовке к заседанию по всем районам было проведено анкетирование о состоянии и проблемах сельхозпредприятий, представлена презентация с итогами анализа анкет.
Поднимались проблемы небольших хозяйств, цен и качества продукции, низких закупочных цен, низкого субсидирования... Визинский филиал КРАПТа требует вложений, там учится мало студентов, но это нужное учебное заведение важно сохранить для подготовки кадров сельхозотрасли.
Все предложения войдут в решение заседания и будут переданы в соответствующие министерства и ведомства для дальнейшей проработки.
«Коми войтыр» Исполкомлöн бöръя аддзысьлöм вылын, колян пекничаö, рака (март) 18 лунö, сёрни мунiс видз-му овмöс сöвмöдöм йылысь да сиктсаяслысь олöмсö бурмöдöм йылысь.
Чукöртчылöмыс вöлi КРАПТ (видз-му овмöс техникум) подув вылын, Выльгорт сиктын. Ми кытшовтiм став гараж-мастерскöй, лабораторияяс, велöдчан жыръяс, Техникумын эм ветклиника, cэнi быдса операционнöй, эм и асланыс «Кунсткамера». Сёрнитiм студентъяскöд. Налы позьö эскыны: техникумын унатор вöчöны, мед быдтыны патриотъясöс! Пызан сайö пуксьытöдз Исполкомсаяс пуктiсны дзоридзьяс Геройяслöн аллея вылын кодзула казьтылан пасъяс дорö. Тайö аллеясö вöлi восьтöма сизим во сайын техникумса студентъяслöн водзмöстчöмöн.
Шöр докладыс вöлi видз-му овмöс да продовольственнöй рынок министр Сергей Николаевич Елдинлöн. Доклад дорö дасьтöма презентация, пуктам сiйöс татчö, тöдмасьны верманныд быдöн.
Мöдысь на ковмис петавны став водзö министрлы, мед сетны вочакывъяс налы, кодъяс висьталiсны мытшöдъяс йылысь му вылын талунъя асланыс уджын. Со найö.
Надежда Владимировна Макарова, «Исток» нима кооперативöн веськöдлысь (Ыджыдвидз): «Йöвлысь донсö, мыйысь ми сдайтам гормолзаводö, колö содтыны этша вылö 12% вылö. Субсидиялысь ыдждасö, мый сетсьö вештыны вöчöм нин рöскодсö, содтыны 40% -öдз ( миян решениеын индöма унжджык – 50%). Том специалистъяслы бöр вöчны распределение серти куим во чöж быть уджалöм».
Наталья Александровна Гусятникова, «Агроресурс» ООО котырлöн учредитель (Чуклöм): «Разберитчöй, кыдзи артмö, мый Гормолзавод ньöбö Чуклöмысь йöв 28 шайтысь, а Чуклöм лавкаын сiйöс вузалöны 102 шайтысь?»
Леонид Валентинович Ларичев, «Ухта-97» Племхозысь дояр: «Колö видз-му овмöсъяссö сетны меставывса веськöдлöм улö да вöчны наысь сельхоз кооперативъяс».
Татьяна Васильевна Ларукова, ООО «Нившера»: «Таво вылö некутшöм субсидия эз на волы, и миянлы нинöм вылö ньöбны кöйдыс да удобрение».
Алексей Иванович Габов, «Сила жизни» кооперативöн веськöдлысь: «Колö предприятие, кöнi позис став дикоросысь вöчны сёян-юан. Нöшта кöр видзысьяс нимсянь шуа: кöр ку переработка колö восьтны. Шыбласьны сы мында озырлунöн абу делö!»
Олег Михайлович Терентьев, асшöр уджалысь (Изьва район): государстволöн быд шайт пуктöмлысь колö донъявны эффективносьтсö. А то сетасны уна миллион шайт скöт начканiн стрöитöм вылö, а мöс юрыс зэв этша. Печоралы государственнöй отсöг сетöмысь эм эффективность, позьö тайöс паськöдны мукöд войвыса районъяс вылö.»
Ми эскам Елдинлы, кыдзи ас, сиктысь петöм, коми мортлы. Но удж сы пельпом вылö усис зэв сьöкыд. Мед эськö командаыс эз торк сылысь став кöсйöмсö. Командасьыс унаöн жö волiсны Исполком вылö, Министерствоын уджалысьяс и «Коми холдинговая компания» акционер котырöн веськöдлысь Матвей Евгеньевич Гегешко. Сылысь презентация пуктам жö татчö, тöдмасьöй, уна буртор аддзанныд, и öнiя овмöсъяслы отсöг сетöм йылысь, и выль овмöс стрöитöм йылысь.
Исполком кежлö дасьтысим ми ставöн: секретар Иван Валерьевич Касев вöчис анкетирование, аддзысьлöм вылын тöдмöдiс, мый майшöдлö и ышöдö сиктын олысьясöс, му вылын зiльысьясöс.
Исполком уджö пырисны и сиктса районъясысь чина войтыр. Константин Анатольевич Сажин, Кöрткерöс районса администрацияöн веськöдлысь, вöзйис шыöдчыны Россия тшупöда власть дорö, мед содтыны «опорнöй» сиктъяс лыдö сиктса администрация улын гырысь оланiнъяс. Василий Витальевич Бадьин, Кулöмдiн районса администрацияын веськöдлысьöс вежысь, юксис районлöн бур вермöмъясöн, мый артмö сöмын öтвыв зiльöмöн. Андрей Геннадьевич Першинöс майшöдлö КРАПТ Визинса филиаллöн аскиалуныс: стрöйбаыс важмöма, велöдчысьыс этша локтö, но районлы тайö велöдчанiныс колö.
Надежда Леонидовна Турова, КРАПТ директорöс вежысь, сёрнитiс дзик нин помланьыс. Ми ас синмöн аддзим, кыдзи сьöлöмсянь зiльöны танi наставникъяс, мед том йöз эз повны сиктса сьöкыд уджысь, öд выль технологияяс локтöны и сиктö, но, дерт, колö, медым Техникумлöн учредитель ыджыдджык öдöн выльмöдiс лабораторияяс, манипуляторъяс, «сюсь» макетъяс, сэки кокньыдджык лоö чукöстны татчö велöдчыны ыджыд вежöра, зiль том йöзöс.
Татьяна Алексеевна Саладина, Каналан Сöветса депутат, сигöртiс сёрнияссö ышöдана кывъясöн, мый насянь отсöг лоас век, кор колö вужвойтыр йöзлысь олöм бурмöдны.
Став тöдчана вöзйöмъясыс пырасны Исполкомлöн помшуöмö. Баласö сылысь, дерт, вöлi водзвыв лöсьöдöма. Исполком кежлö дасьтысигöн лои кытшовтöма овмöсъяс Кулöмдiн, Мылдiн, Кöрткерöс районъясын. Миян веськöдлысь Олег Амвросиевич Лажанев котыртöмöн вöлi некымын аддзысьлöм министр Елдинкöд, Каналан Сöветса депутатъяскöд. Содтöд Исполкомса секретар Иван Валерьевич Касев 2024 воын районъясын нуöдöм коми конференцияяслöн кывкöртöдъясысь корсис ставсö, мый инмö видз-му овмöс сöвмöмлы, да наысь и XIII Съездлöн резолюцияысь буретш и артмис Исполкомлы вынсьöдöм вылö решениелöн сюрöсыс.
Исполкомлöн удж оз помась ки лэптöмöн да кырымпас пуктöмöн. Кöть кутшöм ыджыд вына гижöдыд, сiйö вежсьöмсö ачыс оз вöч. Миянлы колö кад, вын, сям пуктыны. Уджалам, ёртъяс!
Мария Вячеславовна Кузьбожева,
«Коми войтыр» Исполкомлöн веськöдлысьöс вежысь.