Чукӧртчыліс Исполком

Сыктывкарӧ мукӧд кар-районысь сентябрь помын волісны "Коми войтыр" ӧтмунӧмлӧн представительствоясӧн веськӧдлысьяс да зільысьяс.
Исполкомлӧн чукӧртчӧм вӧлі сиӧма коми кывлӧн каналан учреждениеясын да сайтъяс вылын юргӧмлы, кар-районса администрацияяскӧд ӧтувъя уджлы, а сідзжӧ быдвося конференцияяс нуӧдӧмлы, мӧд вося Сикт во кузя уджтасъяс панӧмлы, тавося ӧтмунӧмлӧн проектъяс олӧмӧ пӧртӧмлы.

Уджӧ пырӧдчисны министерствоясын уджалысьяс, Сыктывкар администрацияӧн веськӧдлысь да вежысьяс, республикаса МФЦ-ын уджалысьяс да мукӧд.
Администрацияяскӧд ӧтувъя удж йылысь висьтасисны Сыктывкар, Кӧрткерӧс да Кулӧмдін районса представительствоясӧ пырӧдчысьяс. Сыктывкарса веськӧдлысь Максим Мартышин вочавидзис юалӧмъяс вылӧ, вӧзйис тшӧкыдджыка гижны комиӧн ӧтмунӧмса выльторъяс ӧтуввезйӧ - Сыктывкарлӧн официальнӧй группаясын да сайтъяс вылын.

Чукӧртчӧмаяс ӧткодялісны кар-районса официальнӧй сайтъяс, вӧчисны кывкӧртӧд, мый зэв этшалаын вӧдитчӧны коми каналан кывйӧн и колӧ корсьны петан туйяс. Сідзжӧ вӧзйисны юркарса администрациялы выль стрӧйбаяс лэптігӧн мичмӧдны коми ногӧн, культурнӧй мероприяттьӧяс нуӧдны коми да роч кывъяс вылын, школаясын быть велӧдны коми кыв...

Кыв лабораторияысь шӧр туялысь Ӧньӧ Лав петкӧдліс зэв уна выль лӧсьӧдӧм сайт, мыйӧн позьӧ пӧльзуйтчыны коми кыв велӧдігӧн, вуджӧдчигӧн да прӧста сёрнитігӧн: и онлайн-кывкудъяс, и орфография кузя сайт, коми кыв тӧданін, коми кыв велӧдан сайт, быдсикас текстъяс, оцифруйтӧм важ коми небӧгъяс, газетъяс, Майбыр чат и 4 вуджӧдчанін (ЯндексПереводчик, ГуглПереводчик, fu-lab переводчик, Майбыр переводчик). Став сайтыс пыр выльмӧ и бурмӧ, оз на тыр-бура уджавны вуджӧдчан сайтъяс,но пыр паськалӧ налӧн вермӧмъясыс. Ӧньӧ Лавлыс презентация видзӧдӧй ссылка пыр - docs.google.com/presentati...

Вынсьӧдӧма лои республика пасьта коми йӧзлысь конференцияяс нуӧдан график, кар-районъясын коми войтырлӧн чукӧртчӧмъяс мунасны октябрь-декабрьын.

Сикт во нуӧдӧм кузя велӧдӧм,культура, видз-му овмӧс, вӧр-ва видзӧм, экономика, дзоньвидзалун да мукӧд нырвизь серти представительствояслӧн вӧзйӧмъяс ыстӧма министерствоясӧ да республикалӧн Юралысьлы.

"Коми войтыр" ӧтмунӧмлӧн представительствояс нуӧдӧны некымын проект, корӧны пырӧдчыны став окотитысьясӧс:
"Аддзысьлам?!"- коми семьяяслы паныдасьлӧмъяс, лоӧны и онлайн уджтасъяс,
"Ас ордым"- коми гижысь Елена Козловалы памятник дасьтӧм да том войтырлы мероприяттьӧяс нуӧдӧм,
"Ас йӧз"- асшӧр гижысьяслы конкурс, кывбур да проза гижысьяссянь виччысьӧны заявкаяс.
Став проектӧ позьӧ пырӧдчыны республикалӧн быд пельӧссянь да весиг мукӧд регионъяссянь. Лыддьӧй юӧръяс миян "Коми войтыр" котырысь либӧ гижӧй сообщениеясӧ ассьыныд юалӧмъястӧ.

Чукӧртчылӧмыс вӧлі уна йӧза, уна юалӧма, уна мӧвпа... Уджалам водзӧ коми кыв да коми йӧзлысь олӧм сӧвмӧдӧм-бурмӧдӧм вылын.