Декабрь 23 лунӧ "Коми войтыр" ӧтмунӧмлӧн Президиум чукӧртліс гӧгрӧс пызан сайын коми том войтырлӧн "МИ" котырӧ пырысьясӧс, Национальнӧй политика министерствоын уджалысьясӧс, ревизионнӧй комиссияӧ пырысьясӧс, Сыктывкарса "Коми войтырын" зільысьясӧс кывкӧртавны 2025 -ӧд вося удж, а сідзжӧ  сёрнитны ️"Видзӧдам аскиалунӧ" тема кузя.

Таво артмис чукӧртлыны гӧгрӧс пызанъяс сайын унасикас войтырӧс - томъясӧс и верстьӧӧс, коми кыв велӧдысьясӧс и кагульничаясӧс, власьтбердсаясӧс, сюсь коми войтырӧс республикалӧн ылі пельӧсъясысь да весиг мукӧд регионъясысь.
Сёрнитанторъясӧн вӧліны:
* "Ёнмӧдам ассьыным ловру",
* "Коми кыв- челядьлы, ыджыд вермӧмъяс-республикалы",
* "Кольччам ас му вылын",
* "Видзӧдам аскиалунӧ".

Быд паныдасьӧм дырйи сёрнитысьяс эз сӧмын юксьыны асланыс майшасьӧмъясӧн да мытшӧдъясӧн, но и пуктісны могъяс, вӧзйисны воськовъяс, нуӧданторъяс. Унатор та пиысь пырас мӧдвося уджалан планӧ, мед пӧртны олӧмӧ кӧсйӧмъяс да нырвизьяс.

Быд гӧгрӧс пызан йылысь ми гижлім нин асланым листбокын пыдісяньджык, фотояс да видео сідзжӧ верманныд корсьны миян группаысь Контактысь.

Кутшӧмӧн лоӧ коми йӧзлӧн, коми кывлӧн да коми культуралӧн аскиалуныс - тайӧ абу сӧмын "Коми войтырӧ" пырӧдчысьяслӧн ныртччӧм, а быд коми мортлӧн мог, быдлунъя  удж, ас гӧгӧр коми русӧ кыпӧдӧм, ас челядьӧс коми кывйӧ велӧдӧм, ас кытшын коми культура да традицияяс видзӧм-паськӧдӧм.

А Ті велӧданныд ассьыныд челядьтӧ, внукъястӧ сёрнитны комиӧн да пыдди пуктыны коми традицияяс?

Арсянь Коми Республикалӧн быд кар-районын мунісны коми йӧзлӧн быдвося конференцияяс.
Декабрьын чукӧртчылӧмъяс вӧліны:
4.12.2025 - Интаын, «Сиктъясын олöм котыртöм» тема кузя,
10.12 - Койгортын, "Сикт: мытшӧдъяс да аскиалун. Сиктса том йӧз",
11.12 - Сосногорскын, "Йӧзкостса проектъяс олӧмӧ пӧртӧм",
13.12 - Воркутаын, "Воркуталӧн сӧвмӧм да экология",
22.12 - Чилимдiнын, "Видз-му овмӧс сӧвмӧдӧм",
23.12 - Изьваын, "Изьваса сикт" тема кузя.

Конференцияяс вылын делегатъяс висьталӧны пыді сикт-грездысь майшасьӧмъяс, мытшӧдъяс, мед нӧшта ӧтчыдысь лэптыны колана юалӧмъяс, гижны чукӧртчылӧмлӧн помшуӧмъясӧ-резолюцияӧ да ӧтув власьтбердса йӧзкӧд корсьны петан туйяс. Кывкӧртӧдъяс подув вылын быд кар-районса "Коми войтыр" ӧтмунӧмлӧн юкӧн лӧсьӧдӧ мӧд во кежлӧ ассьыс план, мед збыльмӧдны олӧмӧ колана туйвизьяс.

Быд во кутicны содны Президиумлöн ветлöдлöмъяс, мед пырöдчыны конференцияяслӧн уджö, висьтасьны Исполкомлöн туйвизь йылысь, содтыны шыöдчöмъяс резолюция пытшкö.
Бöръя Исполком вылын тшӧтш вӧчисны та йылысь кывкöртöдъяс.

Пырӧдчӧй кар-районса "Коми войтырлӧн" юкӧнъясӧ, вӧзйӧй ассьыныд отсӧг коми йӧзлысь кыв, культура, оласног видзӧм-сӧвмӧдӧм-бурмӧдӧм могысь!

Помасис коми семьяяслы "Аддзысьлам" нима проект. Арсянь быд тӧлысь коми котыръяс паныдасьлісны мастер-классъяс вылӧ, вурисны традиционнӧй коми паськӧм челядьлы, ворсісны коми играясысь, вӧчалісны салдатъяслы открыткаяс да гижисны комиӧн письмӧяс, нуӧдісны Герой волы сиӧм "Вына войтыр" онлайн фотовыставка семьяпытшса геройяс йылысь.
Ноябрьын чӧсмӧдлісны ӧта-мӧдсӧ коми сёян-юанӧн да юксисны котырпытшса медрадейтана рецептъясӧн.

Декабрь помын 270 морт - республикалӧн кар-районъясысь- волісны семьяясӧн выльвося гаж вылӧ коми театрӧ. Ӧтув пасйисны "Шуда котырлысь" 10 вося юбилей, сьылісны выль коми сьыланкывъяс,  йӧктісны коз гӧгӧр, рисуйтчисны, вундасисны, вӧчалісны аслыныс значокъяс, ворсьсны пу чачаясӧн, видзӧдісны комиӧн мойд, висьталісны комиӧн кывбуръяс, чӧсмасисны юмовторъясӧн...

Видзам коми кыв да культура медводз асланым семьяясын! И Коми Республика пасьта татшӧм котырыс уна! Эскам, мый кужам на видзны пӧль-пӧчьяслысь традицияяс, ёнмӧдам ассьыным вужъяс, нӧшта на паськӧдам ас гӧгӧр коми ру!

Проектсӧ нуӧдісны "Шуда котыр", "Коми войтыр" ӧтмунӧм, Эжваса коми культура шӧрин Национальнӧй политика министерство отсӧгӧн.

Декабрь 12-ӧд лунӧ Сыктывкарын, Вӧр институтын, чукӧртчывліс "Коми войтыр" ӧтмунӧмлӧн Исполком. Кар- районъясысь волісны юкӧнъясӧн веськӧдлысьяс, коді эз вермы локны, пырӧдчис видео-связь пыр, ыстіс видео вылӧ гижӧм шыӧдчӧм...

Олег Лажанев юӧртіс 2025 вося Исполкомлӧн да Президиумлӧн удж йылысь.
Медшӧр сёрнитанторйӧн вӧлі коми йӧзлӧн аскиалун, а сідзжӧ тавося планъяс тыртӧм, мӧдвося план видлалӧм...

Том коми войтырлӧн "МИ" котыр юксис асланыс уджтасьясӧн, козьналісны ылыс районъяслы выль "Сайним" ворсӧм. Исполкомсаяс висьталісны мӧвпъяссӧ аскиалун аддзӧм кузя, мытшӧдъяс венӧм кузя, коми кыв да культура видзӧм-сӧвмӧдӧм йылысь выль нырвизьяс корсьӧм, грантовӧй конкурсъясӧ пырӧдчӧм, кар-районса администрацияяскӧд ӧтувъя удж панӧм...

Татьяна Бушенева дасьтӧма нейросеть отсӧгӧн аскиалун йылысь вочавидзӧмъяс да статистика коми кыв велӧдӧм кузя, коми  традицияяс йылысь...
Заседание помын "La models" модельнӧй агенство петкӧдліс коми ногӧн серлӧдлӧм выльпӧлӧс ӧнія кадлы лӧсялана паськӧм.

Олег Лажанев ошкыштіс ставнысӧ ӧтувъя уджысь, а сідзжӧ сетіс Аттьӧалана гижӧд Национальнӧй политика министерствоын зільысьлы Мира Валерьяновна Чуяшковалы.

Мӧд во кежлӧ уна план, уджалам водзӧ!

Татшӧм сёрни кыпӧдлісны декабрь 9 лунӧ том коми войтырлӧн "МИ" котырын зільысьяс да кар-районысь воӧм студентъяс, уджалысь йӧз. Пырӧдчисны Сыктывкар, Ухта, Сосногорск, Усинск, Кӧрткерӧс, Сыктывдін, Удора, Изьва районъяс, Коми-Перым кытш да весиг Ямалысь коми ныв. Чукӧртчӧмаясӧс чолӧмаліс "Коми войтыр" ӧтмунӧмӧн веськӧдлысь Олег Лажанев да сійӧс вежысь, Каналан Сӧветса депутат Анастасия Михайлова.
Быдӧн висьтасисны, кытысь асьныс, кутшӧм майшасьӧмъяс том йӧзлӧн:
сиктъясын абу удж, больничаяс тупкалӧны,
лёк инфраструктура - киссьӧм посъяс да туйяс, ичӧт удждон да  квартира ньӧбны некыдз, этша прӧст кад колляланін грездын, сійӧн и мунӧны том специалистъяс мӧд регионъясӧ.
Сідзжӧ майшӧдлӧ, мый челядь рочмӧны, оз сёрнитны комиӧн, коми кыв чинтӧны школаясын, челядь яндысьӧны сёрнитны чужан кывйӧн.

Гӧгрӧс пызанӧ пырӧдчысьяс вӧзйисны ассьыныс мӧвпъяс:
- колӧ вӧчны унджык коми кывъя "контент" интернетын (гижӧдъяс, видео, выль коми сьыланкывъяс, подкастъяс...),
- кыпӧдны коми кумиръясӧс, паськӧдны коми блогеръясӧс, 

- тӧдны ас вужъяс,  ас традицияяс комиӧн блог моз висьтавны интернетын, заводитны быдӧнлы ассянь,
- паськӧдны пытшкӧсса туризм,
- тшӧкыдджыка чукӧртлыны коми том йӧзӧс ыджыд мероприяттьӧяс вылӧ, гашкӧ, тшӧтш гожӧмнас,
- коми кывсӧ пыртны современнӧй олӧмӧ, семьяын да садйын сёрнитны комиӧн,
- колӧ унджык современнӧй стилизованнӧй паськӧм коми стильӧн,
- гӧгӧр пыртны этнокультурнӧй элементъяс, используйтны коми орнамент...
- мед видзны коми кыв оз ков велӧдны падежъяс, лыдакывъяс, пыдісянь грамматика, прӧстӧ колӧ сёрнитны  челядькӧд комиӧн!
- мед кольны вына коми йӧзӧн, колӧ видзны да сӧвмӧдны ас гӧгӧр коми кыв да культура, челядьлы водзӧ вуджӧдны...

Анастасия Михайлова содтіс, кутшӧм позянлунъяс эмӧсь томъяслы - земский фельдшер, земский работник культуры,  росмолодежь гранты да мукӧдтор, кытчӧ позьӧ пырӧдчыны да унатор збыльмӧдны олӧмӧ.

Олег Лажанев тӧдчӧдіс, мый ӧткымын майшӧг кузя колӧ думыштны да ӧтув панны удж. "Бур, мый том йӧз асьныс вӧзйӧны унджык велӧдны садик-школаын коми кыв, мед тіянӧс кыласны! Ас пӧвстын колӧ видзны чужан кыв да ассьыным ловру!", - кывкӧрталіс Олег Амвросиевич.
Ставыс миян сайын!